Publici idemque brevissimi nuntii pingebantur in parietibus Pompeianis rubro vel nigro colore prope tabernas vel fullonicas vel ad pistrina et similia, ut civibus Pompeianis persuasum esset ut quosdam candidatos per suffragia eligerent. Et tot erant istae picturae ut olim ignotus civis Pompeianus taedio captus ob tam multos titulos scripserit in pariete hunc hexametrum «Admiror, paries, te non cecidisse ruinis qui tot scriptorum taedia sustineas!». Quam recte scripserit tu iudica ipse lector: mille quingenti tituli nobis pervenerunt ut numerem tantum suasorias et titulos ad eligendos magistratus. Duo magistratus eligendi per suffragia civibus Pompeianis erant: aediles et duoviri, qui erant vel duoviri nullo adiecto titulo vel duoviri iure dicundo si iudicia quoque de iure civili administrabant. Duoviri iure dicundo erant etiam magistratus illi a quorum nomine designabatur annus quo electi essent, sicut Romae de consulibus fiebat. Magistratus superiores sicut censores et consules Romae tantum eligebantur. Plurimae sed non omnes suasoriae ad suffragia pro candidatis captanda erant praecipue costantes vel dicam stabiles. In prima trium linearum scribebatur accusativo casu ut complementum obiectum nomen candidati. In secunda linea pictor pingebat verbis contractis O. V. F. quod indicat «oro vos faciatis» vel potius «oro ut faciatis» quod idem est, cum littera V indicet pariter vel V vel U. In tertia linea pingebatur nomen magistratus cui adpetebat candidatus qui in prima linea nominatus erat. Exempli gratia: «Popidium Secundum IIvir (idest duovirum) oro vos faciatis». Saepe quaedam adiciebantur huic formulae. Post nomen candidati pictor adiungebat e. g. «dignum r. p.» idest «oro vos faciatis aedilem quia dignus rei publicae est». Cum Pompeios coloni ducti essent postquam in exercitu Sullae militaverant et indicabantur nomine colonorum, sed iam antea fuissent incolae eiusdem Urbis qui nominabantur incolae, interdum suffragatores indicabant et colonos et incolas pariter sustinere eundem candidatum. Alia mox vobis adiciam. (1. segue)